Суддзя суда Дубровенскага раёна Ігар Татаеў 16 і 19 траўня за распаўсюджванне экстрэмізму ў сацыяльных сетках пастанавіў аштрафаваць на 1110 рублёў індывідуальную прадпрымальніцу з Мінска Ірыну Новік і інжынера-канструктара жыхара Дуброўна Пятра Патлатага, піша «Віцебская Вясна».
Судом устаноўлена, што «правапарушальніца» Новік пяць разоў у 2022-23 гадах у сетцы Інтэрнэт з дапамогай мэсэнджэра Telegram, перасылала сваім знаёмым інфармацыю з Telegram-канала «Zerkalo.io навіны», прызнанай рашэннем суда Чыгуначнага раёна г. Гомеля «экстрэмісцкімі матэрыяламі».
А «правапарушальнік» Патлаты ў сетцы Інтэрнэт у сацыяльнай сетцы Facebook, выкарыстоўваючы свой акаунт, падпісаўся і захоўваў у адкрытым доступе інфармацыйную прадукцыю з інтэрнэт-старонкі «Zerkalo.io» прызнаную судом «экстрэмісцкімі матэрыяламі».
З гэтых фактаў суддзя Татаеў зрабіў выснову, што Ірына і Пётр вінаватыя ў здзяйсненні адміністрацыйнага правапарушэння, прадугледжаным ч.2 арт.19.11 Кодэкса Рэспублікі Беларусь аб адміністрацыйных правапарушэннях, і пакараў іх штрафам у памеры 30 б.в. без канфіскацыі тэлефонаў.
