Калі раней Дубровенскі суд выносіў па адной палітычнаматываванай пастанове на некалькі месяцаў, то 24 траўня адразу ж дзве. Прычым у абодвух выпадках судзілі не дубровенцаў. З чым гэта звязана?
Справа ў тым, што пад канец красавіка расейская мяжа пачала кантралявацца больш чым у папярэднія дзесяцігоддзі. У прынцыпе лагічнае рашэнне, улічваючы, што менавіта праз гэтую мяжу ідуць наркотыкі ды іншыя забароненыя тавары. Але ж шукаюць тут не столькі кантрабанду. Для сілавікоў гты кантроль стаў повадам правяраць тэлефоны грамадзянаў Беларусі на прадмет падпісак на палітычныя каналы. А калі знаходзяць у тэлефоне такія каналы, то на суд адпраўляюць у Дуброўна.
У прыватнасці 24 траўня Дубровенскі суд асудзіў на 15 сутак жыхара Слоніма, які перасякаў мяжу. У той жа дзень на той жа тэрмін быў асуджаны прадпрымальнік, які таксама не пражываў у Дуброўна, але дакладна горад яго пражывання мы пакуль не ведаем. Іх абвінавацілі ў падпісках на каналы, якія ўладамі прызнаныя экстрэмісцкімі. У абодвух выпадках тэлефоны арыштаваных былі канфіскаваныя.
Відавочна, што нас чакае яшчэ шмат судоў людзей, якіх затрымалі на мяжы не з-за кантрабанды, а па палітычнаматываваных прычынах.
