Для маленькага райцэнтра ў якім жыве меньш за 7.000 чалавек, чатыры палітычныя арышты і суды за пяць дзён — гэта сапраўдная аблава. Але хапалі не толькі мясцовых жыхароў. Так, 7 чысла на трасе Віцебск-Смаленск быў спынены аўтамабіль пад кіраваннем жыхара Віцебска. На гэта трасе не рэдка правяраюць аўтамабілі на прадмет кантрабанды, але сілавікоў зацікавіў тэлефон мужчыны. У выніку Лёзненскі суд арыштаваў віцебчаніна на 5 сутак за наяўнасць у тэлефоне «экстрэмісцкіх матэр’ялаў»: дзве падпіскі на тэлеграм-каналы і пару фотаздымкаў з нацыянальнай сімволікай.

За два дні да таго — 5 чэрвеня — той жа суд судзіў двух мясцовых жыхароў таксама за «экстрэмісцкія» падпіскі. Для іх прысуды былі больш простыя: аднаму штраф у 740 рублёў, другому, па яго ж хадайніцтву, замест штрафу 50 гадзін грамадскіх працаў.

А 9-га чысла іншага мясцовага жыхара асудзілі на 15 сутак. Справа ў тым, што калі да яго прыйшлі сілавікі і хацелі забраць тэлефон на праверку, то тэлефон разбіўся. Ці наўмысна ці не сказаць цяжка. Арыштаваны гаворыць, што ён выпадкова аступіўся і аткім чынам пабіў тэлефон, сведкі гавораць, што ён спецыяльна ўдарыў тэлефон. Але сведкамі на працэсе выступалі супрацоўнікі міліцыі, адпаведна, зацікаўленыя людзі. Суд, прадказальна, стаў на бок міліцыянтаў і мужчына атрымаў 5 сутак за падпіскі і 10 сутак за не падпарадкаванне міліцыі, бо не даў агледзець свой тэлефон.