Гаворка ідзе пра палітвязня Ігара Мінца, які праходзіў па так званай справе "Рабочага руху". Агулам па гэтай справе 10 чалавек - рабочыя розных прадпрыемстваў краіны. Улады абвінавацілі іх у стварэнні эктрэмісцкага фармавання. Хаця экстрэмісцкім яно было прызнана ўжо пасля арышту ўдзельнікаў. Другое абвінавачанне: здрада дзяржаве. Наколькі вядома, за гэтай фармулёўкай хаваецца тое, што ўдзельнікі "Рабочага руху" збіралі факты абыходу санкцыяў і перадавалі іх замежным кантралюючым органам. Наколькі справядлівыя гэтыя абвінавачанні сказаць цяжка, бо падсудныя адмовіліся даваць паказанні ў судзе, а частка суда праходзіла ў закрытым рэжыме. Прынамсі, правабаронцы набралі дастаткова прычынаў, каб прызнаць яго і іншых удзельнікаў справы не справядліва асуджанымі, адпаведна, палітвязнямі.
Па гэтых абвінавачаннях Ігар Мінц атрымаў 12 гадоў узмоцненага рэжыму і штраф у 100 базавых велічыняў. Гэта не самы жорсткі прысуд па дадзенай справе. На днях стала вядома, што Мінца накіравалі ў Шклоўскую калонію. Падтрымаць яго лістамі можна па адрасе: ПК № 17, 213004, г. Шклоў, вул. 1-я Заводская, 8, Ігар Сямёнавіч Мінц
