Вячаслава Малейчука яшчэ ў 2021 годзе абвінавацілі ў падрыхтоўцы актаў тэрарызму. Пры гэтым, на якой падставе яго вінавацілі можна было даведацца толькі з прапагандысцкага роліка ў якім Вячаслаў выглядае збітым, гаворыць не сваімі фразамі. Пры гэтым вядучыя роліка самі блытаюцца: вінавацяць Малейчука, што ён хацеў зрабіць тэракт у вайсковай частцы, а ў выніку дагаворваюцца да таго, што закладзена выбуховае прыстасаванне было на дзіцячай пляцоўцы. Само сабой, аніякага тэракту не адбылося, затое ў яго падрыхтоўцы разам з Малейчуком абвінавацілі Ціханоўскую і BYPOL. Дадало неразбярыхі і тое, што такая рэзанансная справа на якой можна было б зарабіць палітычныя балы, разглядалася ў закрытым рэжыме. Таму канкрэтных фармулёвак не вядома, а праваабаронцы пабачылі ва ўсёй гісторыі прыкметы фальсіфікацыі ды прызналі Вячаслава палітвязнем.

Потым на ўсю гэтую гісторыю (вельмі падыходзячую для негатыўнага піару палітычных супернікаў) проста забыліся. І не ўзгадалі, калі б суд суседняга Горацкага раёна - цяпер ужо ў адкрытым паседжанне, але якое праходзіла на тэрыторыі мясцовай калоніі - не накінуў Малейчуку яшчэ адзін тэрмін. За гэты год гэта ўжо другі раз, калі яму дададаюць тэрміны. Першы раз у Ваўкавыскай калоніі, а на гэты раз у Горацкай. У абодвух выпадках яго вінавацяць у непадпарадкаванні адміністрацыі калоніі.

Калі першапачаткова за тэрарызм, які выклікае пытанні, Малейчуку далі 20 з невялікім гадоў, то цяпер, адседзеўшы два гады, тэрмін ягоны вырас на два гады.