Генеральны пракурор Рэспублікі Беларусь Андрэй Швед расказаў, што прыняць да вядзення крымінальную справу аб забойстве чатырох дзяцей у Воршы было ягоным рашэннем. Словы генеральнага пракурора прыводзіць БелТА.
«На мінулым тыдні адбылася трагедыя ў Воршы, маці забіла чатырох уласных непаўналетніх дзяцей ва ўзросце ад 1 году да 9 гадоў, цяпер Генеральнай пракуратурай вядзецца расследаванне гэтага абуральнага факту», — сказаў Андрэй Швед.
Паводле ягоных слоў, пракурорам трэба будзе разабрацца ва ўсіх абставінах таго, што адбылося, але ён пакуль не мае права выдаваць падрабязнасці справы, бо яшчэ ідзе следства.
Тым не меней, Швед адзначыў, што рашэнне перавесці сям'ю пад катэгорыю сацыяльна-небяспечнага становішча прынялі яшчэ за месяц да трагедыі, аднак яно месяц ляжала на стале адказных асоб без выканання. Таксама Генпракуратура высвятляе, чаму запознена прынялі само рашэнне, бо сігналы пра сацыяльна-небяспечнае становішча сям'і паступалі нашмат раней.
Швед мяркуе, што адказныя службовыя асобы ведалі пра праблему, але не разбіраліся, чаму Ірына Куранкова не можа накарміць сваіх дзяцей.
