Гаворка ідзе пра Мікалая Петрушэнку — былога дэпутата Вярхоўнага Савету СССР, які, сыйшоўшы на пенсію, пасяліўся ў Коханаве. Хаця Пертушэнка шмат гадоў быў сябрам апазіцыйнай партыі "Справядлівы свет" (былая камуністычная, цяпер зліквідаваная ўладамі), у 2020 годзе ён падтрымаў улады. Мала таго, што падтрымаў, — прозвішча Петрушэнкі можна было знайсці ў злітых базах даносаў МУС і КДБ. Ён спрабаваў падставіць пад палітычныя рэпрэсіі ўдзельнікаў пратэстаў і нават даносіў на наш сайт.

Пару месяцаў таму стала вядома, што супраць Петрушэнкі завялі адміністратыўную палітычна матываваную справу — яго вінавацілі ў распаўсюдзе экстрэмісцкіх матэрыялаў.

На старонцы былога дэпутата знайшлі спасылку на старонку, якая ў момант размяшчэння не была прызнанай экстрэмісцкай. Тады ён ў сацыяльных сетках упэўнена пісаў, што справа разваліцца і нічога яму не будзе. Але калі ў краіне "иногда не до законов"... Пасля першага суда Петрушэнку адправілі дамой, а справу на дапрацоўку. І справа была дапрацаваная.

У выніку пару тыдняў таму Петрушэнку асудзілі на 10 сутак адміністратыўнага арышту. Па нашай інфармацыі, на сёмыя суткі ў зняволенні з-за кепскіх умоваў утрымання ў Петрушэнкі адкрылася прабадная язва. Дарэчы, ад гэтай хваробы ў зняволенні загінуў палітзняволены мастак Алесь Пушкін. Петрушэнку, аднак, паспелі даставіць у лякарню і выратаваць яго жыццё.