Інвестыцыі ў рэгіён маюць не толькі эканамічнае значэнне, але і сацыяльнае - стварэнне працоўных месцаў, развіццё інфраструктуры. Пры гэтым, насельніцтва звычайна мала цікавіцца тым якія праэкты прапаноўваюцца да рэалізацыі. Аршанскі райвыканкам таксама мае свае прапановы да патэнцыйных інвестараў.

Па ініцыятыве губернатара распрацаваны інвестыцыйны праэкт будаўніцтва вялікага "аб'екта прыдарожнага сэрвісу" каля новай фабрыкі "Салодкая краіна". Паводле парпановы гэта будзе не проста кавярня ці запраўка. Гэта будзе па-сутнасці забаўляльны комплекс каля дарогі. Прадугледжана будаўніцтва крамы, кавярні, матэляў, альтанак, дзіцячага гульнявога комплексу і вальераў з жывёламі.

На вёскі арыентавана мала праэктаў, акрамя Ліпак, побач з якімі прапануецца рэалізацыя папярэдняга праэкту ўвагу інвестараў звяртаюць толькі на вёску Хімы. У Хімах прапануецца стварыць завод па розліву мінеральнай вады.

На "Аршанскім камбінаце будаўнічых матэр'ялаў" у Копысі прапаноўваецца арганізацыя вытворчасці "клеенай прэсаванай шашкі для паддонаў", на аршанскім "Оршабудматэр'ялы" прапаноўваецца запуск вытворчасці сухіх будаўнічых сумясяў, гэты праэкт ацэньваецца прыблізна ў 300.000 даляраў.

На прадпрыемстве "Белама плюс" прапаноўваецца стварэнне экспартаарыентаванай вытворчасці па перапрацоўцы саломы ў пелеты. Кошт праэкту ацэньваецца ў 1,1 мільёна даляраў.

Самы дарагі сярод ацэненых праэктаў - будаўніцтва і запуск комплекса па перапрацоўцы свініны і ялавічыны ў Балбасава. Плануецца, што такі комплекс будзе перапрацоўваць да 250 тон прадукцыі ў суткі. Кошт праэкту амаль 95 мільёнаў даляраў.

Ужо зараз выканкам шукае інвестараў для будаўніцтва гандлёвых цэнтраў у Барані і ў Оршы па вуліцы Паркавай, у раёне новай забудовы на Сельгастэхніцы. У будучым інвестыцыйны праэкт плануецца стварыць для гандлёвага цэнтру на тэрыторыі былой бальніцы на Заходняй.

Сярод, хутчэй, не камерцыйных праэктаў - будаўніцтва спортзалі і басейна ў Барані і будаўніцтва фізкультурна-аздараўленчага комплексу ў Балбасава.