Аршанскі клуб упершыню ў сваёй гісторыі прабіўся ў 1/4 фіналу Кубка Беларусі. На гэтай стадыі нашай камандзе выпала гуляць супраць віцебскага "Вітэна" - аднаго з наймацнейшых клубаў краіны, на дадзены момант клуб з Віцебска знаходзіцца на 3-м радку табліцы вышэйшай лігі.
Першая гульня пары адбылася 26-га снежня ў Мінску, намінальнымі гаспадарамі былі віцебляне. Ужо на 7-й хвіліне іх гулец Гайдук адрыў лік. Але на 9-й Хомчанка зраўняў. На 14-й Авецісян зноў вывеў "Вітэн" наперад, аднак праз 4 хвіліны Івулін зноў аднаўляе парытэт. Авецісян на 20-й і Шылоўскі на 27-й, здавалася б, здымаюць усе пытанні - 4:2, але Хоміч на 37-й скарачае адставанне - 4:3, прычым карысць аршанцам прынёс выхад на поле 5-га палявога замест брамніка. Яшчэ да выніковага ўдару Хоміча мог забіць Кіташоў, але не рэалізаваў пенальці, прабіўшы ў папярэчыну. На апошняй хвіліне сустрэчы віцебляне забілі ў пустую браму - 5:3.
Наперадзе гульня ў адказ у Александрыі.
