Дзень памяці і прымірэння, прысвечаны Другой сусветнай вайне, быў абвешчаны Арганізацыяй Аб'яднаных Нацый у 2005 годзе, але ў Оршы ён асабліва ніколі не святкаваўся. Па ініцыятыве Руха за Свабоду сябры шэрагу дэмакратычных арганізацый аб'ехалі некалькі помнікаў, каб ускласці кветкі і ўзгадаць мірных жыхароў, стаўшых ахвярамі ваенных дзеянняў. Адмыслова былі выбраныя тыя помнікі, якія знаходзяцца на перыферыі горада, куды рэдка зазіраюць афіцыйныя асобы і дзе мемарыялы звязаныя з канкрэтнымі падзеямі вайны.
Першым помнікам стала масавае пахаванне на 2-м завулку Фурманава, дзе пахаваныя першыя некалькі дзясяткаў ахвяраў вайны. Гэта былі мірныя грамадзяне, якія загінулі пры першым бамбаванні горада ў раёне вакзала.
Наступным дэмакраты наведалі помнік, прысвечаны сотням забітым дзецям. Пад час знішчэння аршанскага гета дзяцей знішчалі асобна: частку расстралялі, частку забілі прыкладамі аўтаматаў.
Трэцім помнікам стала самае масавае пахаванне часоў вайны ў нашым горадзе - некалькі тысяч чалавек пахавана пад адной стэлай.
Акрамя таго, вечарам кветкі былі ўскладзены ў Барані на месцы растрэла гета і ў вёсцы Стаўры.
