Тэрытарыяльная камісія, якая будзе адказваць за выбары ў Аршанскім раёне, была сфармавана 21 ліпеня на супольным паседжанні райвыканкаму і прэзідыюму Савета дэпутатаў. Аб'яднаная грамадзянская партыя і партыя "Справядлівы Свет" старшыні якіх у гэтым годзе маюць намер паўдзельнічаць у выбарах у якасці кандыдатаў у прэзідэнты таксама вылучылі сваіх прадстаўнікоў у склад камісіі, але ўключаны не былі. Прычына не ўключэння аказалася даволі фармальнай - абедзве партыі вылучалі прадстаўнікоў у раённую камісію ад гарадскіх арганізацый, а не ад раённых. Іншым партыям пашанцавала больш. Так, праўладная Камуністычная партыя Беларусі свайго сябра ў камісіі мець будзе. Ім стаў Дзмітрый Бухавец, які раней вылучаўся ў камісію ад БРСМ. Таксама ў склад камісіі патрапіла і прадстаўніца Ліберальна-дэмакратынчай партыі Гайдукевіча - партыя ў розныя часы прылічвала сябе то да апазіцыі, то да прапазіцыі, але ні ў адным лагеры на доўга так і не заставалася. "Справядлівы Свет" плануе абскарджваць не ўсключэнне свайго прадстаўніка ў судзе.

Увогуле на дадзены момант па ўсёй вобласці вядома толькі пра 1 сябра дэмакратычных партый, які патрапіў у камісію - ім стаў вылучэнец ад Партыі БНФ Канстанцін Смолікаў, які прайшоў у абласную камісію.