Галоўныя трэнеры "Оршы" і "Іслачы" падзяліліся ўражаннямі пра матч 14-га туру 1-й лігі чэмпіянату Беларусі. "Іслач" выйшла ў аднаасобныя лідэры лігі, абыграўшы аршанцаў на выездзе 4:0. Словы трэнераў Віталя Жукоўскага і Аляксандра Ладзянога цытуе афіцыйны сайт "Іслачы".
Пасляматчавы каментар галоўнага трэнера "Іслачы" Віталя Жукоўскага:
- Калі ёсць добры стадыён, калі заўзятары прыходзяць на гульню, то заўсёды хочацца паказаць якасную гульню, нават проста для тых, хто прыйшоў на стадыён. Бачна, што ў Оршы любяць футбол. Нашы хлопцы хацелі сёння вельмі многае зрабіць, з такім жаданнем выйшлі гуляць, але не ўсё атрымлівалася. Усё ж мы кантралявалі ход гульні, супернік перабудоўваўся, спрабаваў уцячы ў контратаку. Але ўсё роўна мы гулялі з вялікім запасам і перамаглі заслужана.
Яшчэ раз паўтаруся, што вельмі прыемна гуляць у гэтым горадзе, калі заўзятары ходзяць на футбол. Атрымліваеш вялікі пазітыў ад такіх матчаў. Нам хацелася паказаць яшчэ больш якасны футбол, але неабходна яшчэ больш працаваць. Відаць, што ў хлопцаў трохі назапашваецца стомленасць. Усё-такі з Хімікам правялі кубкавую гульню тры дні таму на выездзе, цяпер у Оршы. Гэта далёкія выезды, а ездзім мы ў дзень гульні. Таму назапашваецца стомленасць, і дзесьці псіхалагічная. Ну нічога, у Еўропе гуляюць праз тры дні на чацвёрты, так што нам да стомы яшчэ далёка. Зараз мы ўжо пачынаем рыхтавацца да заключнай гульні першага круга з Хімікам.
Пасляматчавы каментар галоўнага трэнера Оршы Аляксандра Ладзянога:
- Пачнем з таго, што мы гулялі з лідэрам, вельмі добрай камандай. Калі мы рыхтаваліся да матчу і глядзелі гульні, на мой погляд, Іслач - адна з лепшых каманд нашай лігі. І гульня гэта пацвердзіла. Тое, што чакалі, мы ўбачылі. Вядома, непрыемны лік для нас. Мы спадзяваліся, што зможам даць бой, але пенальці ў пачатку гульні зблытаў усе карты. Таму прыйшлося раскрывацца, каб зраўняць лік. Моманты ў нас, як і ў суперніка былі. Але "Іслач" выкарыстоўвала свае моманты, а мы не змаглі забіць ні аднаго мяча.
