Ініцыятар кампаніі "Справаводства па-беларуску" гомельскі актывіст Ігар Случак пастаянна вядзе перапіску з рознымі дзяржаўнымі органамі на тэму пашырэння выкарыстання ў іх рабоце беларускай мовы. Звычайна мясцовыя выканкамы ахвотна ідуць на кантакт і нярэдка сапраўды пачынаюць падтрымліваць на сваім узроўні мову. Але ліст з Дубровенскага выканкаму аказаўся вельмі таямнічым і здзівіў.
Кампанія "Справаводства па-беларусу" стварала мапу-дыяграму, у якіх рэгіёнах людзі часцей пішуць звароты ў выканкамы па-беларуску, інфармацыю бралі з афіцыйных адказаў тых самых выканкамаў. У Дубровенскі райвыканкам таксама быў накіраваны ліст з просьбай адказаць, колькі агулам лістоў у 2011 і 2012 атрымаў выканкам і колькі з іх было напісана па-беларуску. Гэты перыяд грамадскіх актывістаў цікавіў па той прычыне, што з 2012 года ўсе дзяржаўныя ўстановы мусяць адказваць на той мове, на якой да іх звяртаюцца.
Але Дубровенскія чыноўнікі вырашылі, што гэтую інфармацыю яны могуць даваць толькі сваю кіраўніцтву, але не грамадзянам. Такі выпадак рэдкі, у іншых выканкамах краіны з гэтай інфармацыі таямніцу рабіць не сталі. Прыводзім тэкст адказу цалкам.
