Паважаныя аршанцы!

«Выбары», праведзеныя 11 кастрычніка, не могуць лічыцца справядлівым і дэмакратычным волевыяўленнем жыхароў горада Орша і Аршанскага раёна, а іх вынікі не могуць мець юрыдычнай сілы.

Кааліцыя аб'яднаных дэмакратычных сіл (далей АДС) Аршанскага рэгіёна звяртае ўвагу на тое, што для вядзення выбарчай кампаніі не былі створаны раўнапраўныя ўмовы. Агульнанацыянальныя дзяржаўныя СМІ на працягу ўсёй кампаніі выконвалі прапагандысцкія задачы на ​​карысць аднаго кандыдата - Аляксандра Лукашэнкі. У склад выбарчых камісій улады ўключылі меней 0,5% прадстаўнікоў апазіцыі.

Падлік галасоў на пераважнай большасці участкаў вёўся непразрыста для назіральнікаў і быў несумленным. На тых адзінкавых участках, дзе назіральнікам удалося забяспечыць кантроль за ходам галасавання, вынікі вельмі моцна адрозніваліся ад тых вынікаў, якія былі агучаныя Цэнтральнай выбарчай камісіяй. Гэта значыць, што выбары былі татальна сфальсіфікаваныя, а тыя лічбы, якія абвясціў Цэнтрвыбаркам, не маюць ніякага дачынення да рэальнага волевыяўлення грамадзян.

Кааліцыя АДС Аршанскага рэгіёна заклікае ўлады Беларусі забяспечыць грамадзянам краіны дэмакратычныя правы і свабоды, стварыць перадумовы для правядзення паўнавартасных свабодных і справядлівых выбараў.