Вёска Стаўры знаходзіцца непадалёк ад Оршы па Горацкай дарозе. Бабініцкі сельсавет, да якога яна адносіцца, зрабіў прадпісанне старэйшыне Стаўроў Ігару Грышанаву знесці драўляную альтанку, якую ён паставіў для жыхароў сваёй вёскі. Цікава, што ўлады не выдаткавалі на ўсталяванне альтанкі ані рубля, а сама альтанка стаіць папросту на дварэ і служыць людзям укрыццём ад ападкаў - снегу і дажджоў. Да таго ж тэрміны выдачы прадпісання паводле закону ўжо скончыліся, аднак улады працягваюць настойваць на зносе.

Жыхары вёскі паведамілі, што ім альтанка неабходная. Адна з пенсіянерак, якая жыве ў Стаўрах, кажа аб тым, што аднойчы прастаяла дваццаць хвілін у чаканні аўталаўкі пад дажджом.

Альтанка, пастаўленая Ігарам Грышанавым за свае сродкі.

Праз пэўны час сельсавет апомніўся паставіў сваю альтанку.

У вёсцы няма сталай бібліятэкі і крамы, сельскі клуб Стаўроў быў зруйнаваны бульдозерам, улады ліквідавалі яго, нягледзячы на тое, што жыхары вёскі актыўна выкарыстоўвалі клуб, а ў 2013 годзе там быў праведзены рамонт. Больш за тое - клубам карысталіся не толькі жыхары Стаўроў, але і сяльчане з суседніх Нарэйкава і Свісцёлак. Цяпер у вёсцы ўладам муляе вочы звычайная драўляная альтанка, пастаўленая побач з месцам, дзе стаяў клуб. А раней якраз у клубе людзі маглі перачакаць ападкі.

Ігар Грышанаў паведаміў, што не збіраецца здавацца, а камфорт і дабрабыт 66 жыхароў родных Стаўроў для яго значна важнейшы за розныя пагрозы і адпіскі з Бабінічаў.