Нагадаем, што летам 2015 года старэйшына вёскі Стаўры Ігар Грышанаў сваімі сіламі пабудаваў навес з лаўкай на тым месцы куды прыязжае аўтакрама. Восенню сельскі выканаўчы камітэт ініцыяваў будаўніцтва другой альтанкі, але выпісаў прадпісанне Грышанаву знесці сваю канструкцыю. У выніку справа дайшла да суда.
Суддзя Інна Віктараўна Кохава разглядала справу раніцай 11 лютага. Пасля ўсіх выступаў, суд прыняў рашэнне закрыць спарву па сканчэнні тэрміну даўнасці. Справа ў тым, што старэйшыну вёскі інкрымінаваўся захоп зямлі на якой быў пабудаваны навес (каля 2 метраў квадратных). Паводле дакумантаў, прадпісанне пра парушэнне сельвыканкам выпісаў Грышанаву 8 кастрычніка, а адміністратыўным кодэксам прадугледжана, што пакаранне за такое парушэнне можа наступіць толькі на працягу двух месяцаў, у дадзеным выпадку да 8 снежня. Пры тым, што пратакол на Грышанава быў складзены толькі 29 снежня. З пратаколам выявілася і яшчэ адна цікавая акалічнасць. Паводле суда пратакол ад 29 снежня быў складзены не правільна і накіраваны ў сельвыканкам на дапрацоўку. Назад у суд партакол вярнуўся з той жа датай - 29 снежня - складзены быў без прысутнасці Грышанава, а замест яго подпісу стаяў запіс "ад подпісу адмовіўся", хаця, па словах Грышанава, ён, нават, не ведаў, што пратакол "дапрацоўваецца".
Старшыня сельвыканкаму Марына Матвеева ў сваіх выступах некалькі разоў казала слова "самаўпраўства", не толькі ў дачыненні да альтанкі. Самаўпраўствам яна называла і выданне Грышанвым мясцовай газеткі, стварэнне "улічкомаў" і, нават, святкаванне "Купалля".
Зразумець відавочную ўпартасць мясцовых уладаў у барацьбе з падстрэшкам на прыпынку аўталаўкі вельмі цяжка. У Бабініцкім сельсавеце адно за адным здзяйсняюцца злачынствы, гінуць людзі на пажарах. Замест таго, каб займацца гэтымі рэальнымі праблемамі, усе сілы сельвыканкама на чале з Марынай Матвеевай кінутыя на барацьбу са бяздольнай альтанкай, якая ўсяго толькі абараняла людзей ад дажджу. Тым самым сельвыканкам настроіў супраць сябе жыхароў Стаўроў, якія такой пазіцыі мясцовай улады не падзяляюць.
