Большасць пікетаў кандыдатаў у дэпутаты ў Аршанскім раёне прайшлі ў спакойным рэжыме, без вялікіх эксцэсаў. Кандыдат у дэпутаты ад Беларускага Народнага Фронта Віталь Паўлаў 31-га ліпеня, у апошні дзень збора подпісаў за кандыдатаў у дэпутаты ў Парламент выйшаў на пікет. Ён адбыўся перад уваходам на Цэнтральны рынак. Кандыдат прыйшоў на пікет з нацыянальным, бел-чырвона-белым сцягам. І пікет стаў адметным. Людзі падыходзілі дастаткова актыўна.
Чалавек у камуфляжнай майцы і такіх жа штанах, на выгляд гадоў 45-55, падышоў да кандыдата і пачаў распытваць яго пра планы на будучыню. Адзначыў, што паважае Зянона Пазняка (лідэра КХП-БНФ), любіць Беларусь. Затым неспадзявана перайшоў на крык і ўзгадаў аднаго з кіраўнікоў пратэстнага руху супраць СССР і пачаў вінаваціць ва ўсім ЗША і вайну ў Афганістане. У канцы сваіх зносінаў з кандыдатам у дэпутаты мужчына выкрыкнуў: "Вы прысабечылі сабе наш нацыянальны сцяг!", маючы на ўвазе бел-чырвона-белы сцяг, які Віталь Паўлаў увесь пікет трымаў у руках. Выгукаючы нецэнзурныя словы, мужчына пайшоў уніз па сходах, на рынак.
Многія мінакі спыняліся каля нацыянальнага сцяга і дзякавалі кандыдату ў дэпутаты за выкарыстанне роднага беларусам сімвалу. Некаторыя аршанцы, праходзячы міма, прызнаваліся: "не з'яўляемся прыхільнікамі Партыі БНФ, але падпішамся за любую сілу, якая на выбарах будзе супрацьстаяць цяперашняй уладзе. Мы стаміліся ад усяго гэтага". Былі і прыхільнікі дзейнай улады, але, як правіла, надоўга каля пікета яны не затрымліваліся. Некаторыя жыхары ставілі подпісы за кандыдата Паўлава цэлымі сем'ямі. У Партыі БНФ прызнаюцца, што выкарыстанне нацыянальнага сцяга прыцягвала ўвагу мінакоў, многія з прыхільнікаў беларускага сімвалу падыходзілі да пікетаў без пашпартоў, забыўшы іх дома, з-за гэтага не маглі паставіць подпіс, аднак на словах выказвалі сваю падтрымку. Тым не менш, кандыдату ад Партыі БНФ удалося сабраць неабходную колькасць подпісаў.
Цяпер пікеты змогуць аднавіцца ў наступным этапе кампаніі - агітацыі.
