Скончыліся выбары дэпутатаў верхняй палаты парламента - Савета Рэспублікі. У Беларусі гэтую структуру выбіраюць дэпутаты мясцовых саветаў. І калі, да выбараў у Палату Прадстаўнікоў (ніжняя палата парламента) існуе хоць нейкі інтарэс выбарцаў, бо фармальна гэтых дэпутатаў абіраюць грамадзяне, то выбары верхняй палаты не маюць аніякай інтрыгі і не цікавяць электарат. Ды і сама функцыя Савета Рэспублікі - прыманне або адхіленне законаў прынятых ніжняй палатай - не спрыяе падвышэнню інтарэсу: па-сутнасці, законы пішуцца выканаўчай уладаў і Палата Прадстаўнікоў толькі фармальна прагаласоўвае за іх прыняццё, Савет Рэспублікі да прагаласоўвання ставіцца яшчэ больш фармальна - дэпутаты галасуюць выключна "За".
Ад Віцебскай вобласці, як і ад іншых, у Савет абрана 8 чалавек. З іх толькі адзін чалавек які не працуе на дзяржаўнай службе - буйны бізнэсмэн гендырэктар кампаніі "Марко" Мікалай Мартынаў. 4 чалавекі - гэта чыноўнікі-бюджэтнікі і 3 чалавекі кіраўнікі дзяржаўных прадпрыемстваў. Бліжэйшы да Аршаншчыны дэпутат - Анатоль Анюхоўскі дырэктар Талачынскага кансервавага завода, які вырабляе таннае віно.
Біяграфія новага дэпутата вельмі тыповая для сучаснага беларускага чыноўніка: нарадзіўся на Магілёўшчыне (у 1954 годзе у вёсцы Леніна Горацкага раёна), скончыў Горацкую акадэмію, працаваў у калгасах (працаваў, прынамсі, у двух калгасах ды іншых сельскагаспадарчых прадпрыемствах Дубровенскага і Талачынскага раёнаў), стаў чыноўнікам (быў старшынём Талачынскага раёвыканкаму), атрымаў медалі за Другую Сусветную вайну (узнагароджаны медалямі "65 год Перамогі ў Вялікай Айчыннай вайне 1941-1945 г.г.", "65 год Вызвалення Рэспублікі Беларусь ад нямецка-фашысцкіх захопнікаў").
