Міністэрства фінансаў апублікавала вынікі дзейнасці адкрытых акцыянерных таварыстваў краіны за другі квартал 2016 года. У зводнай табліцы сумы прыбыткаў і стратаў указаныя яшчэ ў недамінаваных рублях.
Па дадзеных за 2015 год прыбытак, а не страты за сваю работу па Аршаншчыне атрымалі толькі 9 прадпрыемстваў. За другі квартал 2016-га колькасць даходных прадпрыемстваў павялічылася да 10. Змяніў сваю пазіцыю завод "Металіст". Калі за 2015 год яго страты склалі 312 мільёнаў рублёў (самыя малыя страты сярод усіх прадпрыемстваў раёна), то ў другім квартале 2016-га "Металіст" атрымаў даход у 184 мільёны рублёў. Пры гэтым, Арэхаўскі "Лантан", які за ўвесь мінулы год зарабіў 5 мільёнаў рублёў, то ў другім квартале 2016-га ён ужо атрымаў страты ў 6 мільёнаў рёблёў.
Сярод стратных прадпрыемстваў змяніліся лідары: за 2015 год найболшы мінус зарабіў "Малочны камбінат", за другі квартал гэтага году найбольшыя страты атрымаў камбінат хлебапрадуктаў - 60,151 мільярды рублёў. На другім месцы па стратах тыя самыя малочнікі - 49,452 мільярды і толькі на трэцім месцы Аршанскі масакансервавы камбінат - які некалькі апошніх гадоў не атрымлівае даходу - з мінус 47,289 мільярдамі рублёў. Вялікі мінус за квартал атрымаў Аршанскі райаграсэрвіс - 34,829 мільярды.
З прадпрыемстваў, якія атрымалі даходы, найбольшы аказаўся ў камбіната "Юбілейны" - 10,197 мільярдаў. На другім месцы "Маяк высокае" з даходам у 5,738 мільярды, за ім "Чырвоны барацьбіт" (1,798 мільярды) і Задроўе з 1,242. Сярод астатніх 6 прадпрыемстваў, якія атрымалі прыбытак аніводнае не зарабіла і аднаго мільярду.
