Ужо ў пятніцу, 6-га студзеня Оршу чакае ўзмацненне маразоў, якія горад адчуў неўзабаве пасля сустрэчы Новага года. Парывы ветру ў пятніцу будуць не такія істотныя, як у чацвер, аднак змена кірунку ветру спрычыніцца да зніжэння тэмпературы. Уранку слабы снег, удзень пахмурна, а затым на суткі ўсталюецца воблачнае з праясненнямі надвор'е. Вільготнасць дасягне 100%. Слупок тэрмометра ўпадзе да пазнакі -25° уначы, ды і ўдзень будзе амаль тая ж тэмпература паветра. Таксама ў сіноптыкаў ёсць і выраз "адчування", а разам з паўночным ветрам для звычайнага чалавека тэмпература будзе адчувацца на ўзроўні -32°.
7 і 8 студзеня тэмпература паветра прагназуецца ў дыяпазоне ад -21° да -27°. І толькі з панядзелка 9-га студзеня моцныя маразы пачнуць адыходзіць, тэмпература прагназуецца ў раёне -10° — -16°.
З асобнымі парадамі да грамадзянаў перад наступленнем моцных маразоў звярнуліся і супрацоўнікі Міністэрства па надзвычайных сітуацыях. У прыватнасці, яны папярэджваюць, што пры абмаражэнні нельга расціраць абмарожаную частку цела воўнай ці снегам, а таксама масіраваць яе. Нельга грэць абмарожаную частку цела на батарэі ці пад гарачай вадой. Не рэкамендуецца прымаць алкаголь, бо ён пашырыць сасуды толькі часова, а затым яны якраз пачнуць звужацца, што негатыўна адаб'ецца на арганізме.
Пацярпелага ад абмаражэння чалавека варта проста трымаць у цёплым месцы, каб у яго спакойна аднаўляўся крывазварот, даваць яму гарбату, какаву. Калі ж абмаражэнне вельмі сур'ёзнае - варта неадкладна звярнуцца па медычную дапамогу. Акрамя таго, не трэба насіць на сабе металічныя ўпрыгожанні, бо метал састывае значна хутчэй за чалавечае цела. На рукі лепей надзяваць вязаныя рукавіцы, а не пальчаткі, яны больш захоўваюць цеплыню. Нельга наносіць на твар крэм, асабліва з увільгатняючым эфектам. Расціраць замерзлы твар лепей не рукавіцай, а голай даланёю, а яшчэ можна проста ўжываць сваю міміку. Такі няхітры спосаб дазволіць пазбегнуць вялікіх праблемаў са здароўем.
Таксама ў сувязі з моцнымі снегападамі і, адпаведна, вялікай колькасцю снегу на вуліцах, ДАІ папярэджвае аўтааматараў аб асабліва асцярожным выкарыстанні сваіх транспартных сродкаў. Некаторыя аршанцы ў гэтыя марозныя і снежныя дні адмовіліся ад паездак на сваіх аўтамабілях і аддалі перавагу грамадскаму транспарту і пешым прагулкам.
