У Аршанскім раёне 23-га траўня па даручэнні Аляксандра Лукашэнкі, займаючага пасаду прэзідэнта Рэспублікі Беларусь, пройдзе выязное пасяджэнне ўраду. Раней Лукашэнка заявіў, што Аршанскі рэгіён неабходна "падняць з руінаў і попелу". Як паведаміў прэм'ер-міністр Беларусі Андрэй Кабякоў, на пасяджэнні будуць разгледжаны многія пытанні, у першую чаргу пра сацыяльна-эканамічнае развіццё рэгіёну. Асобую ўвагу ўрадоўцы перад прыездам надаюць развіццю населеных пунктаў рэгіёну, будуць разглядацца пытанні прыцягнення інвестыцый, будаўніцтва жытла, транспартнай інфраструктуры і працаўладкавання насельніцтва.

Як сказаў Кабякоў, многія чальцы ўраду ўжо выязджалі на Аршаншчыну, каб больш дэталёва азнаёміцца з праблемамі нашага рэгіёну. Гэтыя напрацоўкі, па словах прэм'ера, будуць пакладзены ў падмурак праекту па перазапуску эканомікі Аршаншчыны.

Тым часам на вуліцах Оршы ўжо наводзіцца паказная чысціня, у прыватнасці, нягледзячы на пахмурнае надвор'е, у горадзе павялічылася колькасць людзей у аранжавай форме, якія мятуць вуліцы. У навучальныя ўстановы горада напярэдадні пасяджэння прыязджаюць прадстаўнікі Міністэрства адукацыі. Верагодна, ахова будзе не такой моцнай, як была ў Барані пры прыездзе Лукашэнкі, аднак зноў варта рыхтавацца да ўзмоцненых мераў бяспекі.