Так склалася доля, што аршанцы сёлета двойчы прайгралі ў матчах на выбыванне "Лідсельмашу". Спачатку лідзяне не пусцілі аршанскі клуб у фінал Кубка Беларусі, а цяпер сталі на шляху "чырвона-чорных" у паўфінал чэмпіянату краіны. Усё вырашаў трэці матч чвэрцьфінальнай серыі, які праходзіў у лідскім спартовым комплексе "Алімпія". Лік у серыі да дзвюх перамог быў 1-1, таму заключны матч вырашаў лёс пуцёўкі ў паўфінал. Аршанцам удалося шакаваць мясцовую публіку са старту гульні, на 5-й хвіліне адна з атак "Вітэна" скончылася перадачай Вяршыніна на Дунаева і выніковым стрэлам. Аднак у гэты вечар "Лідсельмаш" было не стрымаць. Гаспадары пляцоўкі забілі тры мячы ў браму капітана прыезджай каманды Мароза і перамаглі 3:1, а разам з тым узялі і серыю 2-1.
У паўфінал выходзіць "Лідсельмаш", які ўжо некалькі сезонаў трэніруе экс-трэнер "Вітэна" Віктар Тарчыла. Таксама ў камандзе гуляюць некалькі колішніх гульцоў "Вітэна". Для аршанскага клуба барацьба за медалі скончана.
