Нагадаем, што на гэтым тыдні Віцебскі фонд дзяржмаёмасці апублікаваў спіс са 136 будынкаў, якія павінны быць занава ўведзены ў гаспадарчы абарот. Шэраг будынкаў паводле гэтага спісу пойдуць пад знос - з гэтымі аб'ектамі вы можаце азнаёміцца тут. Шэраг аб'ектаў прапаноўваюцца ў арэнду. Прычым, у некаторых выпадках частка комплексу будынкаў ідуць пад знос, а другая часта таго ж комплексу ў арэнду.
Так, напрыклад, будзе з кацельнай каля стадыёна "Лакаматыў" - меньшая яе частка, якая складае 261,5 квадратны метр будзе знесена, большая ў 937 з невялікім квадратных метраў здадзена ў арэнду. Не выключаецца, што гэты будынак можа быць і прададзены.
Тое самае будзе з будынкамі будтрэста №18 па вуліцы Бялінскага, д.1. Два будынкі будуць знішчаны, корпус растворных вузлоў у 524 квадратных метры застанецца для здачы ў арэнду. АТП №8 па Леніна 161-а страціць сваю прахадную, але ў арэнду пойдзе будынак шынамантажнага склада, які складае 137 квадратаў.
Таксама пойдуць у арэнду склады "Оршаспецаўтабазы" па адрасе 2-гі завулак Камунальны,2 і корпус "Оршакамгасу" ў Высокаўскім сельсавеце ў 625 з невялікім квадратаў.
Не ўсе будынкі прапануемыя ў арэнду ў добрым стане. Напрыклад будынак кладавой каля чыгуначнага прыпынка "Сонечны". Гэта былая чыгуначная станцыя, якая ў сувязі з паляпшэннем тэхналогіяў перастала выкарыстоўвацца па прызначэнні і была закансервавана. Сёння будынак у кепскім стане, але мае патэнцыял для выкарыстання пад сезонную краму - у летні перыяд у мясцовым пасёлку пражывае вялікая колькасць дачнікаў, якая абслугоўваецца толькі аўталаўкамі.
