Супернікам "Оршы" па 19-м туры чэмпіянату Беларусі ў І лізе стане "Смаргонь". У першым крузе аршанцы вельмі ўпэўнена перамаглі смаргонцаў у гасцях. Тады лік быў 3:0 на карысць "сіня-белых". З таго самага матчу пачалося падзенне "Смаргоні" ў ніз табліцы, бо перад тым матчам з "Оршай" яны займалі 2-е месца ў табліцы. Так, гэта быў тады толькі пачатак сезону, аднак не варта забываць, менавіта тая разгромная параза на сваім полі запачаткавала наступныя няўдачы "мядзведзяў". Цяпер клуб мае толькі 15 пунктаў і знаходзіцца на перадапошнім, 15-м месцы ў табліцы. Ніжэй толькі "Нёман-Агра" са Стоўбцаў.
Аршанцы маюць 22 пункты пасля нічыей у мінулым туры ў Баранавічах. Наша каманда знаходзіцца на 11-м радку табліцы.
Дагэтуль у гісторыі чэмпіянатаў незалежнай Беларусі аршанцы і смаргонцы гулялі 7 разоў, па 3 перамогі на рахунках і 1 нічыя. А вось розніца галоў не на карысць "Оршы" — 12:18.
Матч "Орша" — "Смаргонь" адбудзецца 26-га жніўня на Гарадскім стадыёне, пачатак а 17-й гадзіне.
