44-гадовы беларускі лыжнік Сяргей Далідовіч сабраў ужо крыху болей за 100% неабходнай сумы (30330 тыс. рублёў) для ўдзелу ў Зімовых алімпійскіх гульнях, што пройдуць у лютым 2018 года ў Паўднёвай Карэі. Грошы збіраліся лыжнікам на платформе "Талака". Да заканчэння кампаніі на час публікацыі дадзенага матэрыялу застаецца яшчэ 40 дзён, а любыя грошы будуць ня лішнімі для Далідовіча.
Варта дадаць, што аршанскі лыжнік застаецца лепшым у сваім відзе спорту ў Беларусі, нягледзячы на свае 44 гады. Сам лыжнік родам з Оршы і вядома, што нямала грошай для Сяргей Далідовіча ахвяравалі менавіта аршанцы. А вось як сам спартовец каментуе неабходнасць збіраць грошы:
"Так выйшла, што з-за розных абставінаў я не маю магчымасці трэніравацца з нацыянальнай зборнай. У нейкі момант нехта палічыў, што Далідовіч занадта стары для таго, каб заставацца найлепшым лыжнікам Беларусі. Мне здаецца, гэта несправядліва, калі мая галоўная віна — узрост. Гатовы даказаць на лыжні, што менавіта я варты прадстаўляць краіну на Алімпіядзе 2018.
Зараз я магу трэніравацца самастойна ў Раўбічах, пакуль з мяне не патрабуюць грошай за выкарыстанне спарткомплексу. Маёй спартыўнай пенсіі ў 350 рублёў хапае на транспартныя выдаткі і харчаванне. Аднак для таго, каб патрапіць на Алімпіяду, неабходна прыняць удзел у адборачных спаборніцтвах і прайсці зборы за мяжой. Па маіх падліках, падрыхтоўка на ўзроўні нацыянальнай зборнай абыйдзецца ў 30 тысяч рублёў. Гэтую суму неабходна сабраць да пачатку кастрычніка."
Сяргей Далідовіч нарадзіўся ў Оршы і пачаў займацца спортам у родным горадзе. Потым дзеля развіцця кар'еры пераехаў у Менск. Ён больш за 30 разоў станавіўся чэмпіёнам Беларусі. Гэта будуць сёмыя Гульні спартоўца, які бярэ ў іх удзел ад 1994 года, калі Алімпіяда прайшла ў Лілехамэры (Нарвегіі), а зборная Беларусі выстапала на іх яшчэ пад гістарычным бел-чырвона-белым сцягам. Цікава, што самымі паспяховымі Гульнямі для Далідовіча былі Гульні 2014 года ў Сочы (Расея), дзе ён заняў 5-е месца. І цяпер, у 44 гады Сяргей Далідовіч збіраецца дастойна прадставіць Беларусь на Алімпійскіх гульнях. Алімпіяда ў паўднёвакарэйскім Пхёнчхане адбудзецца з 9 па 25 лютага 2018 года.
