Пра тое якія вынікі асаблівага кантролю ДАІ за ходам уборачнай кампаніі распавёў на старонках сайту УУС інспектар ДАІ Аршанскага РАУС Віктар Цыклінскі. У гэты перыяд ДАІ, сапраўды, надзяляе асаблівую ўвагу кантролем за сельскагаспадарчымі арганізацыямі. Напрыклад, за кожнай гаспадаркай замацаваны свой індывідуальны інспектар ДАІ, які правярае ўборачную тэхніку і яе кіроўцаў.
Не абыходзіцца і без парушэнняў. Напрыклад, быў выяўлены факт перадачы кіравання транспартам асобе якая не мела правоў. Нагадаем, што пад час візіту прэзідэнта на Аршаншчыну журналісты звярнулі ўвагу на тое, што камбайнёр перадаў кіраванне камбайнам Мікалаю Лукашэнка, ці пра гэты выпадак гаворыць іспектар - не ўдакладняецца.
Акрамя таго, выяўлены факт знаходжання за стырном у п'яным стане, выяўлена 26 транспартных сродкаў, якія не адпавядалі патрабаванням правілаў дарожнага руху. За гэтыя парушэнні былі пакараныя 14 пасадоўцаў і гаспадаркам выдадзена 12 прадпісанняў па ліквідацыі недахопаў.
