Пачынаючы з 2006 года (тады на полі каля вёскі Гацькаўшчына апошні раз без перашкодаў уладаў прайшоў фестываль у гонар Бітвы пад Оршай) улады мэтанакіравана перашкаджаюць людзям збірацца на месцы святкавання. У выніку традыцыйны фестываль бардаўскай песні сыйшоў амаль у падполле - праводзіцца ў канспіратыўных месцах не далёка ад Крапівенскага поля і патрапіць туды не запрошанаму чалавеку амаль не магчыма. На сёняшні дзень, людзі якія хочуць адзначыць свята толькі на кароткі час заязжаюць на само поле, а потым едуць у іншыя месцы.
У мінулым годзе міліцыя не затрымлівала ўдзельнікаў святкаванняў, некаторыя, нават, змаглі пераначаваць на полі. Ці будуць затрыманні ў гэтым годзе пакуль не вядома, але перашкоды ўжо пачаліся. Літаральна за дзень да святкаванняў галоўны пад'езд да поля быў разараны мясцовай гаспадаркай. Хаця літаральна яшчэ некалькі год таму тут была нармальная гравійная дарога па якой можна было пад'ехаць да камяня-помніка героям Бітвы. Пра гэта паведаміў адзін з арганізатараў колішніх фестываляў Генадзь Шэпелеў.
