Дуброўна прымае абласныя "Дажынкі", і да іх застаецца тыдзень. Ужо 30-га верасня абласное свята прыйдзе ў горад, а той, у сваю чаргу, парадуе людзей новым фантанам у гарадскім скверы, абноўленым стадыёнам і многімі іншымі аб'ектамі, пра якія orsha.eu не забываў пісаць цягам усёй падрыхтоўкі Дуброўны да свята. Цэнтральная вуліца горада стане на час правядзення "Дажынак" пешаходнай, у горадзе будзе арганізавана 6 кантрольна-прапускных пунктаў (КПП), варта чакаць нямала міліцыі і АМАПу, як і звычайна на святах у Беларусі. Праграма свята насычаная песнямі, спартовымі спаборніцтвамі, дэгустацыяй ежы, рамеснымі вырабамі. Таксама на свята прывязуць турыстаў, у тым ліку з суседняй Расеі, да якой з Дуброўны вельмі блізка. Застаецца выказваць спадзеў і на тое, што на сёлетніх "Дажынках" будзе ўдосталь беларускай мовы і свята сапраўды будзе арыгінальным. Вядома ўжо і праграма свята.
