Кампанія "Тыдзень супраць смяротнага пакарання" праходзіць у Беларусі ўжо некалькі год запар і мае на мэце актуалізаваць пытанне ўзаконеных забойстваў. У гэтым годзе "Тыдзень" праходзіць з 5 па 10 кастрычніка. І хаця мерапрыемствы праходзяць традыцыйна ў розных гарадах, Орша ўпершыню далучана да кампаніі.
У нас мерапрыемства пройдзе ў вёсцы Стаўры сёння 6 кастрычніка ў фармаце публічнай дыскусіі на тэму "масавыя рэпрэсіі і смяротнае пакаранне". На дыскусію акрамя аршанцаў збяруцца праваабаронцы і эксперты з Віцебску ды Мінску. А 16-00 удзельнікі з іншых гарадоў сустрэнуцца ў Андрэеўшчыне каля рэстарана "Радуга" дзе наведаюць Кабыляцкую гару дзе ўшануюць памяць бязвінна загінулых пад час сталінскіх рэпрэсій. Да дыскусіі ў Стаўрах будзе адкрыта тэматычная выстава, а пасля дыскусіі, якая распачнецца а 18-00 адбудзецца прэзентацыя новага дакументальнага фільма Віктара Траццякова "Гісторыя смяротнага пакарання ў Беларусі".
А што будзе адбывацца ў рамках кампаніі ў іншых гарадах? У Баранавічах у кінаклубе "Крытычнае мысленне" паказвалі фільм "Жыццё Дэвіда Гейла", у Гомелі ў адной з арт-прастораў паказалі фільм "Сальвадор".
У Мінску сёння таксама адбываецца публічная дыскусія на тэму "Смяротнае пакаранне: за ці супраць", у якой выступяць Алесь Бяляцкі і Валянцін Стэфановіч. На выходных у Мінску і Брэсце адбудуцца рок-канцэрты "Рок за жыццё". 10 кастрычніка ў Мінску таксама можна будзе пагбачыць фільм "Сальвадор". Ініцыятары кампаніі абяццаюць яшчэ і вулічныя імпрэзы на працягу тыдня, але пра канкрэтныя мерапрыемствы - па зразумелых прычынах - пакуль не паведамляюць.
