Завяршыўся групавы турнір у групе 6 кваліфікацыі на чэмпіянат Еўропы па футболе сярод футбалістаў, не старэйшых за 17 гадоў. Усе матчы групы, апрача аднаго, адбыліся ў Магілёве на стадыёне "Спартак". А Оршы дастаўся адзін, затое самы якасны, бо сустракаліся ў ім зборныя Францыі і Славеніі, якія і выйгралі квартэт. У Магілёве ў апошнім туры зборнай Беларусі перамагла 3:1 каманду Казахстана. А ў Оршы французы са славенцамі вырашалі, хто стане першым.
Варта адзначыць, што па школах і ліцэях Оршы напярэдадні футбола пракацілася дырэктыва "забяспечыць наведваемасць", у выніку навучэнцамі запошнілі амаль палову трыбун, але, канечне, былі і людзі, якія прыйшлі на матч па сваёй волі, хоць ён праходзіў у нязручны працоўны час серады. Пасля першага тайму частка навучэнцаў, пабачыўшы змяншэнне кантролю ад сваіх кіраўнікоў, якія прывялі іх на матч, сышла са стадыёна. Аднак некаторых гульня захапіла. Насамрэч, аршанцы пабачылі ў гэты дзень футбол высокага ўзроўню. Юныя, але ўжо ўмелыя футбалісты з ахвотай разыгрывалі камбінацыі, тым больш на коне стаяла першае месца ў групе.
На 61-й хвіліне Д'ябі адкрыў лік у матчы, а неўзабаве славенцы патрапіліся на контратаку французаў, і Да Кунья падвоіў лік. На 68-й Сіміч адыграў адзін мяч, але апошнія атакі славенцаў з надзеяй зраўняць лік, плёну не далі. Перамога Францыі 2:1.
