26-га кастрычніка ў Оршы знайшлося месца ў Гарадскім цэнтры культуры для спевака, які прапагандуе радыкальныя погляды, у прыватнасці, поўную падтрымку расейскай ваеншчыне ва Украіне і Сірыі. Віктар Каліна вядомы сваёй падтрымкай непрызнаных Беларуссю самаабвешчаных рэспублік ДНР і ЛНР, а таксама хамскімі допісамі ў інтэрнэце, дзе прысутнічаюць нецэнзурныя словы і прамыя абразы ў адрас тых, хто не падтрымлівае яго погляды і творчасць. Пасля таго, як Каліна выступіў у Оршы, ён стаў хваліцца гэтым у сваім фэйсбуку і працягнуў паліваць гразёю тых, хто выступаў супраць яго канцэрту ў Оршы. Пры гэтым, Каліна заявіў, што кіраўніцтва Оршы і аддзел ідэалогіі прачнуліся і выступілі супраць ягонага канцэрту, аднак адмяніць яго ўсё-ткі не змаглі. Па словах Каліны, канцэрту ў Оршы ён абавязаны памочніку старшыні Віцебскага аблвыканкама Мікалая Шарснёва. Пры гэтым заяўленыя спевакі шансона, якія меліся прыехаць з Калінам у Оршу, не прыбылі, так што канцэрт адбыўся не ў адпачатна заяўленым фармаце.

Цікава, што ў сваім свежым допісе Каліна зноў звінаваціў незалежных журналістаў і апазіцыю ў нібыта фальсіфікацыі скрыншотаў, пры тым, што да тых самых допісаў ён актыўна пакідаў каментары, дзе пацвярджаў сваю пазіцыю. Неўзабаве частка з іх была выдаленая, але многія допісы засталіся. Таксама шансанье, які не саромеецца адкрыта падтрымліваць вайну за так званы "рускі свет", адзначыў, што на канцэрт было прададзена ўсяго 160 квіткоў, і гэта адбылося нібыта з-за кіраўніцтва Оршы, якое спачатку не дазволіла канцэрт,а потым было змушанае падначаліцца абласной уладзе.