На этапе выбараў, які скончыўся 24 лістапада, улады павінны былі сфармаваць тэрытарыяльныя выбарчыя камісіі - тыя камісіі, якія будуць арганізоўваць выбары на ўзроўні раёнаў, тыя камісіі ад якіх у значнай ступені будзе залежыць хто пройдзе ў раённыя Саветы дэпутатаў. Выбіраюцца гэтыя камісіі на супольным паседжанні райвыканкамаў і прэзідыюмаў Саветаў дэпутатаў. Такое паседжанне ў Оршы прайшло 24 лістапада раніцай.

Паседжанне выглядала даволі салідна, нават, ліберальна. Па-першае, новы мэр на публіцы глядзіцца лепш за двух сваіх папярэднікаў і прыстойна гаворыць без "паперкі". Па-другое, хаця б, для бачнасці на паседжанні маглі выступіць усе прысутныя (тут быў бачны кантраст паміж праўладнымі, якія казалі вельмі аднолькава і тымі чые прадстаўнікі не патрапілі ў камісію). Праўда, на вынік фармавання камісіяў гэта не паўплывала - у камісію зноў прайшлі толькі праўладныя вылучэнцы. Зноў не абыйшлося без хітрасцяў, калі работнікі выканкаму вылучаліся ад імя грамадскіх арганізацый: для грамадскіх арганізацый ёсць асобная квота, як і для чыноўнікаў. У выніку, усе прадстаўнікі дэмакратычных арганізацый зноў не патрапілі ў камісію. Праўда, адбыўся і незвычайны казус: мэр прагаласаваў за прыём у камісію прадстаўніка партыі "Справядлівы свет" - ён адзіны падняў руку, зачытаўшы прозвішча вылучэнца. Але, падняўшы вочы на залю і пабачыўшы, што іншыя рукі не паднялі запытаў: я нешта не тое сказаў? Відавочна, мэр памыліўся і таму адхіліўся ад "патрэбнага" спісу. Яшчэ адна рука была паднята за страшыню аршанскай арганізацыі АГП Валянціну Ігнаценку. Толькі два гэтых галасавання было з вынікам 1-16. Усе астанія галасаванні прайшлі аднагалосна: 0-17.

Апошні раз у Оршы ў камісіі такога ўзроўню прадстаўнікі дэмакратычных арганізацый патраплялі ў 2004 годзе.