Кааліцыя на сваім чарговым пасяджэнні 1 красавіка абмеркавала вынікі выбараў. Было адзначана, што ў параўнанні з мінулай кампаніяй мелі месца некаторыя станоўчыя змены - даволі дэмакратычнай была працэдура рэгістрацыі большасці кандыдатаў у дэпутаты, многія выбарчыя камісіі вонкава імкнуліся дзейнічаць у рамках Выбарчага кодэкса і г.д.

Разам з тым у дзень выбараў на большасці участкаў назіральнікамі адзначана завышэнне яўкі выбаршчыкаў ад 100 да 600 чалавек на ўчастак. Гэтыя неіснуючыя галасы былі запісаныя праўладным кандыдатам, што дазволіла ім атрымаць незаслужаную перамогу. Кааліцыя палічыла , што шэраг прадстаўнікоў апазіцыі - М.Говараў, Я.Анішчанка, У.Палівада, У.Тамашэвіч ў рэальнасці выйгралі выбары.

У той жа час галасаванне за некаторых праўладных кандыдатаў фактычна было пратэстным . Так , толькі па афіцыйных дадзеных супраць кандыдатуры старшыні райсавета Станіслава Кошкіна прагаласавала 999 чалавек. І гэта пры тым , што яму не было альтэрнатывы. Толькі завышэнне яўкі выбаршчыкаў дазволіла Кошкіна на паперы атрымаць перамогу. Відавочна, што такія вынікі выбараў сведчаць аб масавым недаверы выбаршчыкаў чыноўніку. Падобная сітуацыя і ў нязменнага кіраўніка саўгаса " Маяк Камуны " Рыгора Фалько.

Прысутныя на пасяджэнні кандыдаты ад дэмакратычных сіл выказалі гатоўнасць працягнуць працу на сваіх акругах па рашэнні пытанняў выбаршчыкаў.