Звычайна спакойны райцэнтар 25-га сакавіка нарадзіў палітычны скандал - у Дуброўна была затрыманая, здаецца, найбольшая колькасць актывістаў сярод гарадоў. За выключэннем, канешне, сталіцы.
Хапун пачаўся з самай раніцы. Так, актывіст аб'яднанай грамадзянскай партыі Міхаіл Чэмурака калі разам з жонкай на машыне выязжаў на цягнік да Мінску быў спынены машынай ДАІ, якая ўключыла мігалкі. Былі затрыманыя Міхаіл Чэмурака і яго жонка, але жонка была адразу адпушчана, а Міхаіла пасадзілі ў машыну і павезлі ў РАУС. Працэс затрымання і дастаўку яго ў міліцыю Міхаіл зняў на відэа. Відэа атрымалася даволі вясёлым - затрыманы троліць міліцыянтаў за тое, што ў машыне ДАІ не працуе рамень бяспекі і за некаторыя яшчэ рэчы.
У РАУС Міхаілу распавялі, што ён сведка па справе, якую міліцыя завяла ў сувязі з заявай аднаго з чыноўнікаў Дубровенскага райвыканкаму (магчыма ўжо былога чыноўніка). Чыноўнік, быццам напісаў заяву, што на старонцы Міхаіла Чэмурака ў сацыяльнай сетцы "Аднакласнікі" нехта зняважыў яго гонар і годнасць. Напрацягу 6 гадзін (з перакурамі на якія хадзілі міліцыянты) ў актывіста бралі тлумачэнні. Міліцыянты прагледзелі ўсю старонку "Аднакласнікаў" з моманту яе стварэння, напісалі пратакол апытання на 9 старонак і ў выніку ў прыватнай размове прызналіся, што проста цягнулі час.
На дзеянні міліцыянтаў ужо напісана скарга, якую не адразу прынялі, спасылаючыся, што ў выходны дзень няма адказнага афіцэра.
Горш сітуацыя атрымалася з Наталляй Стрэльчанка. Яе затрымалі а 6 раніцы. Працэс самога затрымання яна паспела выкласці ў фэйсбук прамой трансляцыяй. І потым напрацягу цэлага дня пра яе не было аніякіх звестак. На дадзены момант Наталля адна гадуе двух непаўнагадовых дзяцей - муж пасля канфлікту з дубровенскімі чыноўнікамі з'ехаў у палітычную эміграцыю. Пры гэтым, нават, каб паведаміць дзецям дзе іх маці, міліцыянты не давалі аніякай інфармацыі. Толькі звярнуўшыся ў абласную міліцыю, актывісты АГП даведаліся, што Наталля змешчана пад варту і ноч была ў Аршанскім ізалятары часовага ўтрымання. Яе абвінавачваюць у супраціве супрацоўнікам міліцыі. Суд над Наталляй Стрэльчанка распачнецца каля 10-00 у Дубровенскім суддзе.
На відэа: затрыманне Міхаіла Чэмуракі
Відэа затрымання Наталлі Стрэльчанкавай можна пабачыць па гэтай спасылцы.
