Чэмпіянат-2018 аршанская каманда зноў правядзе ў Першай лізе, дзе яе супернікамі стануць 15 клубаў. Беларуская федэрацыя футбола аказалася няздольнай сабраць цотную колькасць каманд пасля таго, як менскае “Тарпеда” было дапушчанае ў Вышэйшую лігу замест “Крумкачоў”. У выніку кожны тур адна з каманд будзе прапускаць. Для “Оршы” такімі турамі стануць 12-ты і 27-мы.
“Орша” пачала трэніроўкі перад новым сезонам 12-га лютага. Не сказаць, каб позна, але многія з супернікаў ужо трэніраваліся на той момант. У камандзе змяніўся трэнер, замест Юрыя Канаплёва і яго памочнікаў Васіля Дзятлава і Сяргея Чавідаева з камандай працуюць Вячаслаў Акшаеў і яго асістэнт Ігар Гасюта. Каманду ў міжсезонні пакінула большасць мінулагодняга саставу, у прыватнасці, лідэры каманды Аляксей Хадневіч, Дзмітрый Жданок і Валерый Мараў. Паводле непацверджанай інфармацыі, перад шэрагам футбалістаў і трэнераў у клуба засталіся запазычанасці па прэміяльных. Новы трэнер Акшаеў аб’явіў аб тым, што цяпер каманда будзе трэніравацца і жыць рэгулярна ў Оршы. Траіх гульцоў “Орша” ўзяла ў арэнду, гэта Дзмітрый Барадзін, Уладзіслаў Казакоў і Дзмітрый Іваноў, якія належаць “Гомелю”, “Дняпру” і “Тарпеда” (Менск) адпаведна. Брамнік Яўген Кандраценка прыйшоў з “Асіповічаў”, вярнуўся ў каманду і яшчэ адзін брамнік Вячаслаў Камінскі з менскага “Промня”, які сыходзіў ад “сіня-белых” да наваполацкага “Нафтана”, які цяпер стане супернікам аршанцаў па Першай лізе. Яшчэ ў “Оршы” з’явіліся Сямён Смунёў са Смаргоні, Яўген Калінін са “Слоніма” і яшчэ адзін менскі тарпедавец Яўген Лебедзеў.
Акрамя іх, у каманду вярнуўся ці прыйшоў шэраг аршанцаў — Ілля Шчуканцоў, Раман Малафееў, Дзмітрый Суздальцаў, Андрэй Раманаў і іншыя.
Першы матч у сезоне “сіня-белыя” правядуць 6-га красавіка ў Хойніках на стадыёне СДзЮШАР супраць гомельскага “Лакаматыва”. Пачатак а 15:00.
