Футбольны клуб «Орша» працягвае трэсці ад няўдач. У прынцыпова важным матчы, які аматары футбола нярэдка называюць словам «дэрбі», бо сустракаюцца каманды з аднаго рэгіёну, аршанцы прымалі наваполацкі «Нафтан». Раней каманды ў афіцыйных матчах не сустракаліся. Пераможца нефармальна мог лічыцца другім клубам Віцебскай вобласці пасля «Віцебска», які выступае ў Найвышэйшай лізе.
Сіня-белыя рыхтаваліся да матчу з «Нафтанам» пасля нечаканай паразы ў Жыткавічах, якая стала для каманды трэцяй запар. У першым тайме галоў не было, а на 57-й Кабачэўскі забіў доўгачаканы мяч у браму навапалачан. Але да канца матчу аршанцы не датрымаліся. За 14 хвілін да канца пачаўся адрэзак паядынку, за які ў браму «Оршы» заляцелі ажно тры мячы. Спачатку Азам Раджабаў забіў былому клубу, затым вызначыўся Уладзімір Карп, а падвёў рысу Георгій Чытанава. Тры прапушчаныя мячы за восем хвілін, у выніку ўпушчана не толькі перамога, але і нічыя. Пройгрыш «Нафтану» 1:3, і «Орша» апускаецца на 11 радок турнірнай табліцы.
