Год таму прэзідэнт Беларусі Аляксандр Лукашэнка абвясціў мадэрнізацыю некаторых аршанскіх прадпрыемстваў. У спіс трапіў і завод, які раней быў адным з вядучых у Оршы – Інструментальны. Аднак, як паведамляе сайт antijournalist.by, статыстыку якога прыводзіць блогер Віктар Малішэўскі, за цэлы год на Аршанскім інструментальным заводзе былі мадэрнізаваныя толькі 4 металаапрацоўчыя станкі з 400, якія маюцца на прадпрыемстве. Гэта складае 1% ад агульнай колькасці. Заробак на заводзе складае 500 рублёў, але пры гэтым людзей на ім значна меней, чым было ў гады загрузкі завода.
Але пры такой несуцяшальнай статыстыцы неабходна адзначыць, што сума грошай, адпушчаных на мадэрнізацыю Інструментальнага, была скарочана ўтрая ад абяцанай спачатку сумы. Пры гэтым Камітэт дзяржкантролю і Міністэрства прамысловасці мелі розныя погляды на прагрэс завода.
