Завяршаецца летняя пара, і яна стала стрэсавай не толькі для Інструментальнага завода і для Авіярамотнага, але, па ўсёй верагоднасці, і для Мясакамбіната. Паводле інфармацыі, што паступіла ў нашу рэдакцыю ад работнікаў прадпрыемства, якія пажадалі застацца ананімнымі, забойны цэх, а фактычна цэлы камбінат апынуўся перад пагрозай часовага закрыцця. Паведамляецца, што на АМКК з планавай праверкай пабывала санстанцыя, якая нібы падвергнула сумневам гатовасць да працы забойнага цэху. Мясакамбінату пастаўлена задача ліквідаваць праблемы да 1 верасня, каб пазбегнуць закрыцця забойнага цэху. Ананімныя крыніцы на камбінаце гавораць, што асобных работнікаў некалькі дзён нават пакідалі пасля працы фарбаваць бардзюры ў месцах, дзе ажыццяўляецца прагон быдла, і займацца іншым упарадкаваннем на тэрыторыі, каб "упісацца" ў санітарныя нормы і зноў адпавядаць усім патрабаванням. Парушэнні не крытычныя і, відаць па ўсім, на АМКК паспеюць іх выдаліць.

Сёлета Аршанскаму мясакансерваваму камбінату споўнілася 88 гадоў. Гэта найбуйнейшы ў Беларусі вытворца мясных, мясараслінных і рыбараслінных кансерваў для дзіцячага харчавання, а таксама агульнага спажывання.

Сёлета аршанскае прадпрыемства атрымала польскія інвестыцыі памерам 15 мільёнаў еўра на пабудову новага забойнага цэху да снежня 2019 года. На тэлеканале АНТ у эфіры ідзе кулінарнае шоў "Быстро Вкусно Полезно" пры падтрымцы камбіната.