Упраўленне Следчага камітэта па Віцебскай вобласці расследуе крымінальную справу, заведзеную на дваіх мужчынаў з Оршы, затрыманых за гандаль зброяй. Аднаму 63, другому 35 гадоў. Нагадаем, што іх затрымалі ў Дубровенскім раёне, дзе яны завяршылі чарговую здзелку па продажы зброі і атрымалі 1,2 тысячы даляраў за пісталет ТТ і рэвальвер сістэмы "Наган". Міліцыя адразу назвала гэта часткай аперацыі па ізаляцыі крымінальных аўтарытэтаў. Як высветліла праверка аператыўнікаў, раней адзін з затрыманых аршанцаў удо быў знаёмы з Крымінальным кодэксам на ўласным досведзе. Але не за гандаль людзьмі, як памылкова паведамлялася раней, а за незаконную здабычу рыбы, што, бясспрэчна, з'яўляецца менш цяжкім злачынствам. Увесь даход у апошні час 35-гадовы мужчына здабываў, меркавана, крымінальнымі спосабамі, а менавіта тым самым продажам зброі. Яго саўдзельнік — пенсіянер.
Сярод зброі, якую збылі мужчыны грамадзянам значацца пісталет тыпу "ПММ" калібра 9 мм, выраблены саматужным спосабам са складовых частак рознай зброі з прыстасаваннем для бясшумнай стральбы і пісталет "Beretta" калібра 9 мм, якія, згодна з заключэннем балістычнай экспертызы, з'яўляюцца наразной агнястрэльнай зброяй і прыдатныя для выкарыстання па сваім мэтавым прызначэнні (на мове аператыўнікаў: здзяйсненні стрэлаў). Таксама была канфіскавана і іншая зброя, па якой у цяперашні час экспертамі Дзяржаўнага камітэта судовых экспертыз праводзіцца балістычная экспертыза.
У цяперашні час затрыманым прад'яўлена абвінавачванне па ч.3 арт.295 Крымінальнага кодэкса Рэспублікі Беларусь (незаконныя дзеянні ў дачыненні да агнястрэльнай зброі). Да абвінавачаных прыменена мера стрымання ў выглядзе заключэння пад варту.
