Рэгіён, Грамадства

Новы помнік у Сянне

02.07.2019 09:24

3235 праглядаў, 0 каментароў

У Сянне ўсталявалі помнік ахвярам Халакосту (фота).

У Сянне ўсталявалі помнік ахвярам Халакосту. Ён з’явіўся на месцы расстрэлу 965 габрэяў у гады ІІ Усясветнай вайны. Помнік з кампазітнага матэрыялу стаіць на пляцоўцы ў форме зоркі Давіда. На абеліску жаночыя, мужчынскія і дзіцячыя рукі, працягнутыя да неба ў пошуках паратунку. А таксама менора і зорка Давіда. Тэкст напісаны паслядоўна на іўрыце, беларускай і расейскай мовах. Тэкст кажа: «На гэтым месцы 30-31 снежня 1941 года фашыстамі былі расстраляны 965 мірных грамадзян, вязняў яўрэйскага гета горада Сянно». У той дзень усіх сенненцаў габрэйскага паходжання нацысты загналі ў яміны і загадалі легчы, пасля чаго забівалі, а дзяцей закопвалі жыўцом. У адрозненне ад некаторых выпадкаў цудоўнага ўратавання у іншых месцах, у Сянне ніхто з загнаных у яры не пазбег гібелі.

У бліжэйшыя дні адбудзецца афіцыйнае адкрыцьцё помніка, да яго прынясуць камяні, што паводле габрэйскай традыцыі азначае далучэнне да вечнасці. Акрамя таго, на адкрыцці будзе гучаць габрэйская памінальная малітва «Кадзіш».