У эканоміцы Віцебскай вобласці ў чэрвені 2019 г. было занята 486,6 тыс. чалавек. Па дадзеных камітэта па працы, занятасцi i сацыяльнай абароне Віцебскага абласнога выканаўчага камітэта колькасць зарэгістраваных беспрацоўных на канец чэрвеня 2019 г. склала 2 тысячы чалавек. Узровень зарэгістраванага беспрацоўя на канец чэрвеня 2019 г. склаў 0,4% ад колькасці працоўнай сілы. Узровень беспрацоўя ва ўсёй Беларусі (у адпаведнасці з метадалогіяй Міжнароднай арганізацыі працы) — 4,4% ад колькасці працоўнай сілы.
Намінальная налічаная сярэдняя заработная плата работнікаў Віцебскай вобласці ў чэрвені 2019 г. склала 916,8 рубля. Сярэдні заробак па краіне складае 1080,5 рубля.
У той жа час шэраг экспертаў па эканамічных пытаннях падкрэслівае, што паняцце «сярэдні» не з’яўляецца універсальным і не адлюстроўвае ўзроўню жыцця ў краіне. Не так даўно наш сайт, да прыкладу, паведамляў пра тое, што Лёзненскі і Сенненскі раёны ўваходзяць у лік 7 самых бедных раёнаў краіны згодна зарплаты. А што тычыцца колькасці беспрацоўных, то, як раней казалі прадстаўнікі незалежных прафсаюзаў, толькі малая частка беспрацоўных рэгіструецца на біржах. Мноства людзей у Оршы, Дуброўне, Сянне, Барані нават не становяцца на ўлік, разумеючы ілюзорнасць шанцаў уладкавацца на добра аплачваемую працу. І проста з’язджае на заробкі ў Расею, Польшчу, Чэхію, Нямеччыну і іншыя краіны. На жаль, пакуль ўсе запэўніванні ўлады аб вывадзе Аршаншчыны у прыватнасці «з руін і попелу» застаюцца не больш чым пракламацыі і абяцаннямі.
