Нават у такой тэме як смяротнае пакаранне ёсць месца мастацтву. На выходных у Оршы прайшоў фестываль супраць смяротнага пакарання.

На мерапрыемстве, якое прайшло ў вёсцы Стаўры на аграсядзібе «Пуцяціна» сабраліся як госці з Мінску, так і аршанцы. Першай выступіла пісьменніца і правабаронца Паліна Сцепаненка, больш вядомая аматарам літаратуры як Паліна Качаткова. Яна распавяла пра гісторыю кампаніі «Правабаронцы супраць смяротнага пакарання», пра найбольш яскравыя выпадкі з якімі сутыкалася кампанія за час свайго існавання і тое з чаго яна пачыналася.

А з чаго пачыналася кампанія можна было пабачыць у новым фільме Віктара Траццякова «Мы супраць смяротнага пакарання». Усё пачыналася з ліста Івана Фаміна, які стаў ахвярай самаагавору. Пасля забойства, якое здзейсніла група ліца Іван Фамін узяў віну за забойства на сябе, хаця сам не быў забойцам. Ён спадзяваўся, што яму як самаму маладому не дадуць вялікі тэрмін, а рэальныя забойцы абяццалі яго зрабіць «каралём» на зоне і ўвогуле падтрымліваць. Суд жа прыгаварыў маладога чалавека да смяротнага пакарання. Прычым, тыя хто па службе быў вымушаны прыводзіць пакаранне таксама ведалі, што чалавек будзе пакараны не за сваю віну.

Хаця на мерапрыемстве і не планавалася арганізаванай дыскусіі, пасля прагляду фільма яна распачалася стыхійна.

Закрываў мерапрыемства аршанскі малады паэт Алесь Макарэвіч, які прачытаў некалькі вершаў аб смяротным пакаранні як у сучаснасці, так і ў ранейшыя эпохі.

Вашай увазе фільм: «Мы супраць смяротнага пакарання».

На фота: Паліна Сцепаненка адкрывае мерапрыемства

На фота: каардынатар кампаніі «Правабаронцы супраць смяротнага пакарання» Андрэй Палуда

На фота: чытае вершы Алесь Макарэвіч