У матчы 4-га туру чэмпіянату Беларусі па міні-футболе ў спартовым комплексе "Алімпіец" аршанскі "Вітэн" сустрэўся з дэбютантам беларускага міні-футбольнага першынства — клубам "Мінск". Пры аўдыторыі ў 150 гледачоў аршанцы выйшлі наперад на 11-й хвіліне ў выніку трапнага стрэлу Казла. На самым старце другой паловы Якубаў падвоіў лік. Але датрымаць пераможныя лічбы аршанцам не ўдалося. Дзёрзкія дэбютанты сышлі ад паразы, прычым істотную ролю ў гэтым адыграў...аршанец Дзмітрый Швядко, які выступае ў іх складзе. Спачатку пасля яго ўдалых дзеянняў мяч ва ўласную браму зрэзаў Дзядзічкін, гэта здарылася за 5 хвілін да канца сустрэчы. Менчукі выпусцілі на пляцоўку брамніка-ганялу і сталі прадпрымаць спробы зраўняць лік. І ім гэта ўдалося. За секунду (!) да сірэны Швядко асіставаў Чэрніку, які прынёс "Мінску" нічыю. 2:2.
"Вітэн" няўдала пачаў сезон, усяго 5 пунктаў у 4 матчах. Каманда займае 8-е месца.
