Сёлета Оршу будуць прадстаўляць у чэмпіянаце Беларусі па валейболе ўжо дзве каманды. Да традыцыйнага прадстаўніка нашага горада ў гэтым відзе спорту мужчынскага клуба "Узлёт" сёлета дадалася і жаночая каманда — "Кацюша". Абедзьве каманды выступаюць у сваіх чэмпіянатах у дывізіёне Б. "Узлёт" ужо шмат год трэніруе Наталля Лобчанка, трэнеры "Кацюшы" Міхаіл Падгол і Ганна Балабанава.
У сёлетнім чэмпіянаце, у адрозненне ад мінулых, тур будзе складацца толькі з аднаго матчу, а не з двух. "Узлёт" першы тур праводзіў дома, аршанцы выйгралі два сэты ў гарадзенскага "Камунальніка", аднак гасцям удалося пераламіць хаду сустрэчы. Вырашальны сэт таксама застаўся за "Камунальнікам". "Узлёт" саступіў ва ўпартай барацьбе 2:3 (25:21 25:20 23:25 21:25 13:15).
"Кацюша" дэбютавала ў чэмпіянатах краіны матчам у Гомелі. І таксама прайграла. Мясцовая "Надзея" перамагла 3:1 (25:11 22:25 25:11 25:15).
