У 24-м туры чэмпіянату Беларусі сярод каманд Першай лігі "Орша" на сваім полі прымала "Смалявічы", аднаго з лідэраў сезону. На 27-й хвіліне Яўген Барсукоў вывеў гасцей наперад, а на 42-й Аляксандр Джыгера падвоіў лік на табло. Зрэшты, на апошняй хвіліне першай паловы сустрэчы Дзмітрыю Іванову ўдалося скараціць разрыў і забіць свой 15 мяч у чэмпіянаце. Болей толькі ў Юшына з "Белшыны" — 19.
Другі тайм доўга не прыносіў ніякага выніку ніводнай з каманд, пакуль на 73-й Федзянін не ўскладніў задачу "Оршы" да мяжы — 3:1 на карысць прыезджых гульцоў. У канцы сустрэчы пачаўся "бенефіс арбітраў", як трапна назвалі падзеі на аршанскіх трыбунах, якія, дарэчы, былі амаль пустыя. На 88-й Барсукоў забіў з пенальці, а ва ўжо кампенсаваны час галоўны рэферы паставіў яшчэ адну "кропку". Яго асістэнт вырашыў праявіць прынцыповасць і ў вельмі сумнеўным эпізодзе паведаміў галоўнаму пра тое, што брамнік "сіня-белых" Дзмітрый Харытонаў нібыта пакінуў лінію брамы да прабіцця 11-метровага. Аршанскі галкіпер атрымаў дзве жоўтыя карткі за некалькі секундаў, быў выдалены за спрэчкі з суддзямі. Лявіцкі з пенальці падагульніў сустрэчу, якая завяршылася буйной паразай "Оршы" 1:5.
Паводле інфармацыі, якую мае наша рэдакцыя, дырэкцыя ФК "Орша" збіраецца падаваць у судзейскі камітэт Беларускай федэрацыі футболу скаргу на дзеянні брыгады пінчука Дзмітрыя Курадоўца і лайнсмэнаў Антона Палуянава з Мазыра і Сяргея Цеслюка з Гомеля. Адпаведна, федэрацыі будзе адрасаваная і просьба ануляваць чырвоную картку Дзмітрыю Харытонаву, каб той не атрымаў дыскваліфікацыі.
