Старт валейбольнага сезону не задаўся ні для мужчынскага "Узлёта", ні для жаночай "Кацюшы". Першыя пакуль не набралі неабходную форму, хаця было зразумела — перагуляць гомельскі "Паперапрам", ды яшчэ на яго пляцоўцы будзе цяжка. Так і здарылася — аршанцы ў кожнай з партый навязвалі суперніку барацьбу, але ўрэшце саступалі. Гамельчукі былі мацней 3:0 (25:20 25:20 25:23).
"Кацюша" пакуль толькі набіраецца неабходнага досведу ў другім па сіле жаночым дывізіёне. Маладым, а часам яшчэ і юным аршанкам супрацьстаяць каманды, якія маюць у складзе гульцоў, што прайшлі элітны дывізіён. На выходных "Кацюша" прадказальна саступіла берасцейскаму "Прыбужжу" — 1:3 (25:23 21:25 20:25 18:25). Аднак, як запэўнілі у трэнерскім штабе нашай каманды, перад "Кацюшай" сёлета не ставіцца высокіх турнірных задач, асноўнае — імкнуцца гуляць годна нават з прызнанымі лідэрамі лігі і набірацца вопыту. А ўжо затым можна будзе казаць пра далейшыя этапы развіцця каманды. Важна ўжо тое, што Орша нарэшце атрымала дарослую жаночую каманда ў гульнявым відзе спорту, тым больш у валейболе, традыцыі якога ў горадзе даўнія.
