За апошні месяц выйшла некалькі артыкулаў у спартовай прэсе, якія адзначаюць высокую наведвальнасць хакейных матчаў з удзелам новаўтворанага клуба "Лакаматыў". Але ў камандзе не выступае ніводнага аршанца, і насамрэч яна карыстаецца не той папулярнасцю, пра якую заяўляецца. Напярэдадні наша рэдакцыя, а таксама тэлеграм-канал NEXTA атрымалі паведамленні пра чарговы этап прымусу, які санкцыянаваны намеснікам старшыні Аршанскага райвыканкама Калачовым і намеснікам старшыні гарана Булаўкам. Гэтыя чыноўнікі рассылаюць загады па школах, спускаючы згары "нормы", паводле якіх кожная школа мусіць прадаставіць пэўную колькасць вучняў на хакейны матч. А ёсць яшчэ і настаўнікі. У выніку мінімум працэнтаў 10-15 ад агульнай колькасці гледачоў на трыбунах складаюць тыя, хто прыведзены пад прымусам паводле адмысловых спісаў.
Савецкія метады па "напаўненні трыбун на спартова-масавых мерапрыемствах", такім чынам, квітнеюць у Оршы. І мы атрымліваем лішняе пацверджанне гэтаму.
