Орша, Спорт

Узроўні розныя

11.11.2019 12:50

2483 прагляду, 0 каментароў

«Орша» праваліла канец матчу з «Белшынай» і ў выніку разгромна саступіла.

У матчы 28-га туру чэмпіянату Беларусі ў Першай лізе "Орша" прымала на сваім полі бабруйскую "Белшыну". У першым коле першынства аршанцы атрымалі сухую паразу 0:5 у Бабруйску. У Оршы не ўдалося ўзяць рэванш. Наадварот, сіня-белыя прагулялі хоць і з меншым, але таксама разгромным лікам 1:4. Першы гол бабруйчане забілі на апошніх секундах першай паловы гульні, што часта здараецца з аршанцамі ў гэтым сезоне. У другім тайме намаганнямі Луціка, які зрабіў дакладны навес на галаву Кучарава, аршанцам удалося зраўняць лік. Заставалася гуляць яшчэ паўгадзіны. Але самае цікавае для "Белшыны" і самае прыкрае для аршанцаў было пакінута на апошнія 11 хвілін. Нават на 5-хвілінны прамежак паміж 79-й і 83-й хвілінамі, за гэты перыяд "Белшына" забіла тры (!) мячы. Такая рэзкая разбалансаванасць і бязвольнасць аршанцам вылілася ў канчатковы лік 1:4.