Здаецца за ўсю гісторыю прэзідэнцтва гэта першы выпадак, калі такую заяву ў выбарчую камісію падаў жыхар Оршы. Гэтым гістарычным першынцам стаў Аляксандар Школьнікаў - старшыня Аршанскай структуры аргкамітэту па стварэнні Сацыял-дэмакратычнай партыі "Народная грамада". Праўда, прагаласаваць за яго ні аршанцы, ні іншыя грамадзяне краіны не змогуць. Бо Аляксандар вылучаецца як "кандыдат пратэсту" - гэта стратэгія распрацаваная Мікалаем Статкевічам. Паводле яе па ўсёй краіне будзе вылучана 30 кандыдатаў, якія зарэгіструюць свае ініцыятыўныя групы, што дасць ім магчымасць цалкам законна выстаўляць пікеты на час збору подпісаў і агучваць грамадскія і палітычныя праблемы.
Прыблізна з такой жа матывацыяй Школьнікаў вылучаўся кандыдатам на мінулыя парламенцкія выбары - для таго, каб у час збору подпісаў на пікетах можна было камунікаваць з грамадствам і агучваць публічна праблемы.
