За гэтую выбарчую кампанію актывіст АГП з Дуброўна ўжо двойчы паспеў пабываць у Аршанскім ІЧУ. Першы тэрмін ён адседзеў цалкам, але другі раз - калі яго прысудзілі да 13 сутак арышту, Міхаіла выпусцілі праз 6 дзён. Такую тактыку ў дачыненні да палітычных затрыманых улады пачалі выкарыстоўваць у канцы 2019 года. Спачатку актывіста асуджаюць, а потым выпускаюць, а тэрмін застаецца "вісець" і ў любы момант чалавека зноў могуць затрымаць для дасіджвання.

7 ліпеня Міхаіл узяў патрэбныя ў турме рэчы, кнігу і рушнік, якія ў мінулы раз у спешцы прыхапіў з ІЧУ з сабой і пайшоў у Аршанскі РАУС прасіцца дасядзець свае суткі. Рушнік і кнігу міліцыянты прынялі з усмешкай і задавальненнем, а вось самога Міхаіла не прынялі. Патлумачылі гэтую адмову тым, што ў такім выпадку на затрыманага павінен прыйсці асобны дакумант. Як у такім выпадку без асобнага дакуманта Міхаіла выпусцілі? Застаецца загадкай.

Але Міхаіл вельмі хацеў вярнуцца ў турму і вярнуўшыся ў Дуброўна пайшоў прасіць патрэбную паперку ў старшыні Дубровенскага суда - не дапрасіўся, потым запісаўся на прыём да начальніка Дубровенскага РАУС, праўда сустрэў яго на вуліцы і папрасіў выпісаць паперу... Але Міхаіл Чамурака і зараз на волі.

Нехта можа палічыць гэта тролінгам, але насамрэч Міхаіл хоча дасядзець суткі зараз, а не аказацца нечакана затрыманым бліжэй да 9 жніўня.